நல்லது நடக்குதுங்கோ

4$ பெட்ரோல் விலையால் அமேரிக்காவில் நடந்த சில நன்மைகள்

2008-10-27T18:22:00.009-06:00

இந்த ஆண்டு ஜீன், ஜீலை மற்றும் ஆகஸ்ட் மாதங்களில் உச்சத்தை தொட்டிருந்த பெட்ரோல் விலை தற்பொழுது அமேரிக்க மற்றும் உலக பெருளாதார வீழ்ச்சியால் விலை குறைந்தாலும், உச்ச விலையும் அதன் தாக்கமும் ஒரு சில நன்மைகளை அமேரிக்காவிற்கும் ஏனைய நாட்டிற்கும் ஏற்படுத்தியிருக்கிறது.

அவைகளில் சில

உலகமயமாக்கலில் அமேரிக்கர்களின் நாட்டம் குறைந்துள்ளது. 2000 ஆம் ஆண்டு தொடக்கம் 2008 க்குள் சீனாவில் (சாங்காய்) இருந்து அமேரிக்காவிற்கு (நீயூ ஜேர்சி) சரக்குகளை கொண்டு செல்லும் செலவினம் மூன்று மடங்காக அதிகரித்துள்ளது. இதன் பொருட் மேசை-நாற்காலிகள் தயாரித்து விற்கும் ஒரு சில நிருவனங்கள் தற்பொழுது உள்ளூரிலே தமது உற்பத்தியை செய்ய துவங்கிவிட்டன. தற்பொழுது ஏற்பட்டுள்ள அமேரிக்க பொருளாதரவு சரிவும், ஓபமாவும் இந்த மாற்றத்தை மேலும் துரிதபடுத்துகின்றனர்.
நகரத்தில் இருந்து தெலைவிலேயே வசிக்க விரும்பும் அமேரிக்கர்கள் தற்பொழுது தங்களது அலுவலகம் இருக்கும் நகரத்துக்கு அருகாமையிலே தமது இல்லங்களை அமைத்துக்கொள்ள விரும்புகின்றனர். இதனால் பெட்ரோலுக்கு செலவிடும் பணத்தில் சற்று சேமிக்க விரும்புகின்றனர்.
வாரத்திற்கு 4 நாள் வேலை! கோகோ நகரம், புளோரிடா மாகணத்தில் உள்ள பிரோவர்டு கல்லூரி கோடைகாலத்தில் வாரத்தில் நான்கு நாட்கள் மட்டுமே (2007-ல் இருந்து) இயங்குகிறது. இதன் மூலம் வருடத்திற்கு $268,000 சேமிக்க இயலுகின்றது. வீட்டில் இருந்து வேலை பார்கும்(Work From Home) பழக்கமும் தற்பொழுது அதிக அளவில் ஊக்குவிக்கப்படுகின்றது.
குறைந்த அளவிளான சுற்றுபுற கேடு. 2008-ம் ஆண்டு ஏப்ரல் மாதம் அமேரிக்கர்கள், 2007 ஏப்ரல் மாதத்தை காட்டிலும் 1.4 பில்லியன் மையில்கள் அதாவது 224,00,00,000 KM குறைவாக பயணம் செய்துள்ளனர். இது கிட்டதட்ட 64 மில்லியன் பெட்ரோலை மிச்சம் செய்துள்ளது.
நேர்தியான சிக்கனம்! அமேரிக்காவில் இயங்கும் பொதியூர்திகள் (18 wheeler truck) மற்றும் அதன் நிருவனங்கள் பொதிகளை வினியோகிக்க மிகச்சிறந்த வழித்தடங்களை (Optimal route) கண்டரிய மென்பொருட்களை உபயோகிக்கின்றன!
சாலை விபத்துக்களும் அதனால் ஏற்படும் மரணங்களின் எண்ணிக்கைகளும் குறைந்தன.
மேலே கூறிய காரணத்தால் வாகன காப்பீட்டு (Auto Insurance) கட்டணம் குறைந்தது.
குறைந்த அளவிளான போக்குவரத்து நெரிசல்.அதனால் சற்று விரைவாக அலுவலகம் செல்ல இயன்றது.
வேறும்மென வண்டியை ஒடவிட்டு காத்திருக்கும் காவல்காரர்களுக்கு அரசாங்கம் கிடுக்கு பிடி போட்டுள்ளது.
குறைந்த உடற்பருமன் (Obesity) நோய்! அதிகப்படியான பெட்ரோல் விலையால் அமேரிக்க மக்கள் சைக்கிள்களை அதிக அளவில் உபயோகித்தனர் மற்றும் வெளியே சென்று கண்டதை தின்னும் பழக்கமும் சற்றே குறைந்திருந்தது. பெட்ரோல் விலையை கேலனுக்கு $1 ஏற்றினால் அமேரிக்காவில் உடற் பருமன் நோயை பெரும்மளவு குறைக்க இயலும் என்றும் அதன் மூலம் பல உயிர் இழப்புகளும் தவிர்க இயலும்.

ஒவ்வொரு தீமையும் ஒரு நன்மையோடே வருகின்றது என்பது இதை பார்தால் நம்பத்தான் தோன்றுகிறது.

"உடற்பருமனை" போக்க முயலும் நியூயார்க் நகரம்!

2008-04-17T22:42:00.011-06:00

மருத்துவவியலின் அடிப்படையில் சராசரியாக ஒவ்வொருவருக்கும் அவரது உயரத்திற்கு ஈடான எடை எவ்வளவு இருக்க வேண்டுமென்ற அளவுகோல் இருக்கிறது, இதனை உடற் பருமன் சுட்டி (அ) சுட்டு எனலாம். (Body Mass Index).

தேவையான எடைக்கு 10% அதிகமாக இருப்பவர்களை "அதிக எடை" கணக்கில் அமெரிக்க தேசிய உடல்நல நிறுமம் (American National Institutes of Health NIH) சேர்க்கிறது. (So, in common terms, overweight refers to an individual with a body mass index or BMI > 25)

உடற்பருமன் (Obesity) உடலின் அமைப்புத் தேவைக்கானதை விட அதிகமாக இருக்கும் உடற்கொழுப்பு; கணிப்பின்படி, இருக்க வேண்டிய எடைக்கு 30% அதிகமாக இருப்பவர்களை உடற்பருமன் கணக்கில் (obesity) மருத்துவர்கள் சேர்க்கின்றனர்.
(More commonly, obese refers to any individual with a body mass index or BMI > 30)

உதாரணமாக, 25 வயது ஆரோக்கியமுள்ள ஆணுக்கு (சராசரி தினசரி வாழ்க்கையில்) ஒரு நாளைக்கு 2400 கலோரி உணவு தேவை, ஒவ்வொரு நாளுக்கும் அவர் 500 கலோரி அதிகமாக உணவு அருந்தினால், சில மாதங்களிலேயே "அதிக எடை" குழுவிற்கு வந்துவிடுவார், ஆண்டுகள் கடப்பதற்குள் அவர் "அதிக உடற்பருமன்" நிலைக்கு வந்துவிடுவார், அத்துடன் தேவையில்லாத பல நோய்களையும் சேர்த்துக் கொண்டிருப்பார். மெக்டொனால்ட்ஸ் மற்றும் பெரும்பாலான உணவகங்களில் அவர் தினசரி உணவு அருந்தும் கட்டாயம் இருந்தால், தேவைக்கு அதிகமான கலோரி உண்ணும் நிலையிலிருந்து அவரால் தப்ப இயலாது. பெரும்பாலான வீட்டு உணவுகளுக்கும் வியாபார உணவக உணவுக்குமுள்ள பெரும் வித்தியாசம் இந்த அளவுக்கதிகமான கலோரி உணவுதான்.

வீட்டில் சமைத்து உண்பது என்பது பெரும்பான்மையான அமெரிக்கர்களுக்கும் அமெரிக்க குடும்பங்களுக்கும் குதிரைக் கொம்பு போல, பெரும்பான்மையான குடும்பங்களின் உணவுக்கான மாதாந்திரச் செலவில் 40% க்கு மேல் வெளியே உண்பதற்காக செலவு செய்யப்படுகிறது. மெக்டொனால்ட்ஸ், பர்கர் கிங் போன்ற உணவுத் தொடர்களும் மற்ற பல பெரும் உணவகங்களும் பரிமாறும் உணவு வகைகளில் மிகப் பெரும்பான்மையானவை அளவுக்கதிகமான கலோரி கொண்டுள்ளதால், வெளியே உண்ணும் அமெரிக்கர்களுக்கு உடற்பருமனும், உப்புசமும் அது சார்ந்த பல நோய்களும் கடந்த இருபதாண்டுகளில் அதிகரித்துள்ளது.

மொத்த அமெரிக்க மக்கள் தொகையில், மூன்றில் இரண்டு பங்கானவர்களின் உடல் எடை அவர்களின் உடல் அமைப்புத் தேவைக்கும் அதிகமாகவே உள்ளது. அமெரிக்க மருத்துவ உலகமும், அரசு உடல்நல நிறுமங்களும் இது குறித்த விழிப்புணர்வை மக்களிடையே ஏற்படுத்தி கொண்டிருக்கின்றன.இந்த விழிப்புணர்வின் தொடர்பாக, பல்வேறு தன்னார்வ இயக்கங்களும், சூழல் ஆர்வலர்களும் அனைத்து உணவகங்களிலும் பரிமாறப்படும் உணவின் கலோரி அளவினைத் தெரியப்படுத்த வேண்டுமென வலியுறுத்திக் கொண்டிருக்கின்றன.

2004ஆம் ஆண்டில் வெளியிடப்பட்ட விவரணப்படம் "சூப்பர் சைஸ் மீ" (Super Size Me!), மெக்டொனால்ட்ஸ் போன்ற பெரும் உணவகங்களில் விற்கப்படும் அளவுக்கு அதிக கலோரியுடைய உணவினால் ஏற்படும் உடற்கேடுகளையும், அந்த உணவகங்களின் வியாபார நோக்கினால் மக்களுக்கு ஏற்படும் உடற்பருமன் தொடர்பான பிரச்சினைகளையும் மக்களிடையேயும் ஊடகங்களிடையேயும் கொண்டு சென்றது.

கடந்த ஜனவரி 22,2008 அன்று, நியூயார்க் நகர்மன்றம், நியூயார்க் நகருக்குள் உள்ள பதினைந்துக்கு மேற்பட்ட உணவகத் தொடர் கொண்டுள்ள அனைத்து உணவகங்களும், மார்ச் 31 முதல் உணவுப்பட்டியலுடன் கலோரி அட்டவணையும் வெளிப்படுத்த வேண்டுமென உத்தரவிட்டிருந்தது. "உணவு தெரிந்தெடுக்கும்போது, உணவின் கலோரி அளவு மக்களின் தெரிவை கவனமாக்கும், அவர்களின் உணவும் ஆரோக்கியமாகும்" என்பதே அவர்களின் கருத்து.

நகர்மன்றத்தின் இந்த முடிவை எதிர்த்து, உணவக உரிமையாளர்கள் நீதிமன்றத்தில், "அமெரிக்க அரசமைப்புச் சட்டத்தின் முதல் திருத்தத்திற்கு" எதிரானது என வழக்கு தொடர்ந்தன. வழக்கை விசாரித்த அமெரிக்க பெடரல் நீதிபதி, "மக்களின் நலனுக்கான அரசின் உத்தரவு இது என்றும் கலோரி அட்டவணைகளை உணவகங்கள் நிச்சயம் அளிக்க வேண்டும்" என உத்தரவிட்டுள்ளார்!

இன்றைக்கு நியூயார்க் நகருக்கு அளிக்கப்பட்டுள்ள உத்தரவு இன்னும் சில ஆண்டுகளில் அமெரிக்கா முழுவதுமே வரக்கூடும். உணவுப்பட்டியலுடன் கலோரி அட்டவணை தரப் பெறுவதால், உணவருந்தச் செல்பவர்கள் முன்னைவிட கவனத்துடன் உணவை தெரிவு செய்யும் வாய்ப்பும், உணவகங்களும் அதிக கலோரி உணவுகளைத் தவிர்த்து ஆரோக்கியமான வாய்ப்புகளை அளிப்பதற்கும் இந்த முடிவு வழியளிக்கிறது. அமெரிக்காவில் கடந்த இருபதாண்டுகளில் சிறிது சிறிதாய் கூடிவந்த "உடற்பருமனை", அடுத்த இருபதாண்டுகளில் பெரிதாய் குறைக்கும் வாய்ப்பும் அளிக்கிறது.

இதே தொல்லையில், இந்தியாவும் நுழைந்து கொண்டிருக்கின்றது, மேற்கத்திய தாக்கத்தில் பீட்ஸாவும் பர்கரும் தினம் உண்ணும் பழக்கம் அதிகரித்து வருகையில், இது போன்ற நிகழ்வுகளின் கற்றலினால் "உடற் பருமன்" அளவுக்கு போகாமல் இருந்தால் நல்லது. மேலும், உடல் எடை, தினசரி கலோரி தேவை குறித்த விழிப்புணர்வு பெரிதும் வரவேண்டும், இரத்த அழுத்தம், சர்க்கரை நோய் மற்றும் இதய நோய்களின் பெருக்கத்தினை கட்டுப்படுத்த "உணவு" குறித்த விழிப்புணர்வும் உடற்பயிற்சி குறித்த விழிப்புணர்வுமே சரியான வழி!

உடல் எடை கூடுவதைத் தவிர்ப்பதற்கான சில வழிமுறைகள்: -
1) உணவில் காய்கறி வகைகள் அதிகம் சேர்த்துக் கொள்ளுதல்
2) எண்ணெயில் பொறித்த உணவுப் பண்டங்களை குறைத்தல் மற்றும் உணவில் எண்ணெய் உபயோகத்தை குறைத்துக் கொள்ளுதல்
3) காலை உணவினை தவறாமல் எடுத்துக் கொள்ளுதல்
4) தனக்கு தேவையான தினசரி கலோரி அளவையும், தினம் உண்ணும் உணவுகளின் கலோரி அளவுகளையும் தெரிந்து கொள்ளுதல்
5) நேரம் கடந்து உணவு அருந்துவதை தவிர்ப்பதுவும், நேரத்தில் தூங்குவதற்கு கற்றுக் கொள்ளுதலும்
6) தினசரி வாழ்க்கையில் உடலுழைப்பு அதிகம் இல்லாதவர்கள் (நம்மில் பெரும்பான்மையானவர்கள்) குறைந்தது ஒரு மணி நேரம் நடை பழகுதல் அல்லது உடற்பயிற்சி செய்தல்

சில தொடர்புடைய தொடுப்புகள்
-----------------------------
http://www.nytimes.com/2008/04/17/nyregion/17calorie.html
http://www.obesityinamerica.org/geographic.html
http://www.obesityinamerica.org/obesitybasics.html

உடற்பருமன் சுட்டி (Body Mass Index Calculator)
http://www.obesityinamerica.org/bmi_calculator.html

http://www.ext.vt.edu/pubs/nutrition/348-951/348-951.html

Super Size Me movie Introduction

மரம் தங்கசாமி

2008-03-18T17:21:00.006-06:00

புவி வெப்பமாதல், காடுகளின் அழிவு என மரம் வளர்ப்பின் முக்கியத்துவம் பற்றி உதட்டளவில் மட்டும் எல்லோரும் பேசிக் கொண்டிருக்கும் நிலையில் தனி மனிதராக 6 ஆயிரம் மரங்கள் வளர்த்திருகிறார் விவசாயி தங்கச்சாமி.

புதுக்கோட்டை மாவட்டம், ஆலங்குடி அருகேயுள்ள சேந்தன்குடியில் 15 ஏக்கர் நிலப்பரப்பில் சுமார் 195 வகையான 6 ஆயிரத்துக்கும் மேற்பட்ட மரங்கள் சூழ்ந்திருக்கும் 'கற்பகச் சோலை'யை மரம் தங்கச்சாமி (60) என்று அழைக்கப்படும் இவர் உருவாக்கி இருக்கிறார்.

பறவைகள் வரவேண்டும் என்பதற்காக பழங்கள் தரும் மரங்கள், குடிப்பதற்கு தண்ணீர்த் தொட்டி, வனவியல் விரிவாக்க மையம்போல ஆங்காங்கே மர வளர்ப்பு விழிப்புணர்வு வாசகங்கள் அடங்கிய பதாகைகள் என் அவருடைய 'கற்பகச் சோலை' ஒரு சின்ன வனமாகவே காட்சியளிக்கிறது.

சேந்தன்குடியில், தான் உருவாக்கிய 'கற்பகச் சோலை'யில் மரக்கன்று நடும் பணியில் 'மரம்' தங்கச்சாமி (வலமிருந்து இரண்டாவதாக)

எட்டாம் வகுப்பு வரையே படித்திருக்கும் இவர் உருவாக்கியிருக்கும்'கற்பகச் சோலை'யைப் பார்ப்பதற்காக் உள்நாட்டிலிருந்து மட்டுமின்றி பல்வேறு வெளிநாட்டு ஆராய்ச்சியாளர்களும் இங்கு வந்து செல்கின்றனர். தோட்டக் கலைத் துறையினர், வனத் துறையினர், பள்ளி, கல்லூரி மாணவர்கள், இயற்கை விவசாயத்தில் ஈடுபாடுள்ள விவசாயிகள் என இங்கு வந்து செல்லும் அனைவரிடமும் தங்கசாமி சொல்லும் செய்தி ஒன்றுதான் அது "இயற்கையே கடவுள்".

தான் உருவாக்கியிருக்கும் வனம் குறித்து தங்கச்சாமி கூறியது:

இயற்கையே கடவுள் என முழுமையாக நம்புபவன் நான், எனக்கு எல்லாமே மரங்கள்தான். எல்லோரும் பழனி, சபரிமலை, வேளாங்கண்ணி எனக் கோயில்களுக்கு மாலை போட்டுச் செல்வார்கள். நான் 48 நாள்கள் விரதம் இருந்து காலை, மாலை இரு வேளைகளும் மரங்களை வணங்கி வேளாண் ஆராய்ச்சி நிலையங்களுக்குச் சென்று அங்கு வரும் விவசாயிகளுக்கு
அன்னதானம் செய்து விரதத்தை முடிப்பேன்.

அரசியல் தலைவர்கள, விஞ்ஞானிகள், பார்வையாளர்கள் என யார் இங்கு வந்தாலும் சரி அவர்கள் கையால் ஒரு மரக்கன்றை நடவைத்துவிடுவேன். இங்கிருந்து ஒரு மரத்தை வெட்ட வேண்டிய சூழல் எற்பட்டால் அதற்கு மாற்றாக இரு மரக்கன்றுகளை நட்டுவிடுவேன்.

வாழ்வதற்கான தகுதியைக் கொஞ்சம் கொஞ்சமாக உலகம் இழந்து வருகிறது. சமூக அக்கறை உள்ள ஒவ்வொருவரும் அதிக அளவில் மரம் வளர்ப்பதை ஒரு கடமையாக வைத்துக்கொள்ள வேண்டும். இயற்கையோடு கூடிய வாழ்வுக்கு நாம் திரும்ப வேண்டும். அப்போதுதான் அழிவை எதிர்கொள்ள முடியும்" என்றார் தங்கச்சாமி.

புதுக்கோட்டை மரம் வளர்ப்போர் சங்கத் தலைவராக இருந்து வருகிறார் தங்கச்சாமி. இவரைக் கெளரவிக்கும் வகையில், லண்டனில் 1992-ல் வெளியிடப்பட்ட 'விவசாயத்தை விவசாயிகளே தீர்மானிக்கட்டும்' என்ற ஆங்கில நூலின் அட்டையில் அவருடைய படம் வெளியிடப்பட்டது.
மரம் வளர்ப்புக்காக பல்வேறு விருதுகளை பெற்றிருக்கும் தங்கச்சாமி, விரைவில் 'இந்திர பிரியதர்ஷினி' விருது பெற இருக்கிறார்.

'கற்பகச் சோலை'க்கு வந்து செல்வோர் தங்கள் கருத்துகளைப் பதிவு செய்ய பார்வையாளர்கள் குறிப்பேடு ஒன்று இங்கு வைக்கப்பட்டுள்ளது. 1994-ல் இங்கு வந்து சென்ற நார்வே விஞ்ஞானி எல்லன்ஹாட்ஸ்வாங் அதில் தன் கருத்தை இவ்வாறு பதிவு செய்திருகிறார்.

"இந்தியப் பிரதமர் 'கற்பகச் சோலை'யைப் பார்த்தால் இந்தியாவின் சிக்கலைத் தீர்க்க வழி கிடைக்கும்!"

நன்றி:- கே. சுரேஷ் திணமணி

காசு வாங்காத கான்வென்ட்... அசத்தல் அரசுப்பள்ளி!

2008-02-23T07:58:00.007-07:00

சகிப்புத் தன்மையும், அர்ப்பணிப்பு குணமும் இருந் தால் அரசுப் பள்ளியைக் கூட கான்வென்ட் ரேஞ்சுக்கு மாற்றிவிட முடியும் என்று நிரூபித்திருக் கிறார் ஒரு தலைமை ஆசிரியர்.

புதுக்கோட்டை மாவட்டம் அறந்தாங்கிக்குப் பக்கத்தில் இருக்கிறது மாங்குடி கிராமம். சரியான போக்குவரத்து வசதிகூட இல்லாத இங்கு ஊராட்சி ஒன்றிய நடுநிலைப்பள்ளி இருக்கிறது. மாங்குடியை சுற்றியிருக்கிற பத்து கிராமங்களின் ஏழை மற்றும் நடுத் தரக் குடும்பத்துக் குழந்தைகளுக்கு ஆரம்பக் கல்விக்கு இதுதான் ஒரே பள்ளி. வழக்கமான அரசுப் பள்ளிகள் போலவே இயங்கி வந்த இங்கே மூன்றாண்டுகளுக்கு முன் ஜோதிமணி என்பவர் தலைமை ஆசிரியராக வந்த பிறகு, மளமளவென மாற்றங்கள்!

மூன்றே ஆண்டுகளில் 'யூனிஃபார்மில் அசத்தும் மாணவ-மாணவிகள், வகுப்பறை தவறாமல் பெஞ்ச்- டெஸ்குகள், ஒவ்வொரு வகுப்பறைக்கும் கேபிள் இணைப்புடன் கூடிய டி.வி-க்கள், வகுப்பறைக் குள்ளேயே பைப்பைத் திருகினால் குடிநீர், கம்ப் யூட்டர் கல்வி, தையல் பயிற்சி, கைத்தொழில் பயிற்சிகள்' என பள்ளியை பிரமாதப்படுத்தியிருக்கிறார் ஜோதிமணி.

இதனால் கவரப்பட்ட கல்வித்துறை உயரதிகாரிகள்... புதுகை,தஞ்சை, சிவகங்கை மாவட்ட ஆசிரியர்களுக்கு சம்பளத்துடன்கூடிய விடுப்பு கொடுத்து, இந்தப் பள்ளி நடக்கும் விதத்தைப் பார்த்துவிட்டு வரும்படி அனுப்பிக்கொண்டு இருக்கிறார்கள். இந்த ஆண்டுக்கான மாவட்டத்தின் சிறந்த பள்ளியாகவும் இப்பள்ளி தேர்வாகியிருக்கிறது.

''எப்படி இப்படி சாதிக்க முடிந்தது?'' என்று ஜோதிமணியிடம் கேட்டோம்.

''இந்தப் பள்ளியில 260 ஸ்டூடன்ட்ஸ் படிக்கிறாங்க. நான் வந்த புதுசில்
மாணவர்கள் மட்டுமில்லை, சில ஆசிரியர்கள்கூட பள்ளிக்கு சரியா வர்றதில்லை. பள்ளிக் கூடத்தைச் சுத்தி ஒரே காடா இருந்துச்சு. இருந்தாலும், நமக்கு குடுத்திருக்கிற வேலையைசரியா செஞ்சாஎல்லாத் தையும் மாத்தி டலாம்னு நெனைச்சேன். அதுக்கு ஊர் மக்கள் ஒத்துழைப்பு கொடுத்தாங்க.

நான் இங்கே வந்த அடுத்த மாசம் தீபாவளி... அப்ப பேரன்ட்ஸ் மீட்டிங் போட்டு 'இந்த வருஷம் உங்க பிள்ளைகளுக்கு எடுக்கிற டிரெஸ்ஸை யூனிஃபார்மாவே எடுத்துடுங்க'னு சொன்னேன். இதில் சில குழந்தைகளுக்கு வருத்தம் இருந்திருக்கலாம். ஆனா, பெற்றோர் அப்படியே செஞ்சாங்க. அதுதான் எனக்குக் கிடைத்த முதல் வெற்றி. அதுக்கப்புறம் காம்பவுண்ட் சுவர், கம்ப்யூட் டர் வசதின்னு நீங்க இப்போ பார்க்கிறதுல முக்கால் வாசியை ஆறே மாசத்துக்குள் கொண்டு வந்துட்டோம்'' என்று சொன்னவர்,

''ஐந்தாம் வகுப்பு மாணவன் ஆங்கில வார்த்தைகளை எழுத்துக்கூட்டி படிக்கிற அளவுக்கு இருந்தாலே போதும் என்கிறது கல்வித்துறை சட்டதிட்டம். நான் இங்கு வந்தபோது, எட்டாம் வகுப்பு படிக்கிறவன் தமிழைப் படிக்கவே தடுமாறினான். ஆனா, இப்ப ஐந்தாம் வகுப்பு மாணவனுக்கு எட்டாம் வகுப்பு மாணவனுக்கான கல்வி அறிவைக் கற்றுக் கொடுத்திருக்கிறோம். மாணவிகள் ஒரு வாரமானாலும்கூட ஜடையை அவிழ்த்து கட்டாம வந்துட்டிருந் தாங்க. அதை மாத்துறதுக்காக ஒரு நாள் ஒத்தை ஜடையும், மறுநாள் ரெட்டை ஜடை யும் போட்டுட்டு வரணும்னு கண்டிஷன் போட்டோம். அதுலருந்து தினசரி தலைக்கு எண்ணெய் வைத்து சுத்தமா வாரிக் கொண்டு வர ஆரம்பிச்சுட்டாங்க.

மாணவர்களுக் கிடையே கடிதம் எழுதும் திறனை வளர்க்கணும் கிறதுக்காக ஒவ்வொரு வகுப்பறையிலும் தபால் பெட்டிகளை வச்சிருக்கோம். ஒவ்வொரு வகுப் பிலும் மாணவர் களுக்குள்ளேயே ஒரு போஸ்ட்மேனும் போஸ்ட் மாஸ்டரும் இருக்கிறார்கள். மாணவ போஸ்ட் மாஸ்டரிடம் 50 காசு குடுத்தால் அவர் 'கார்ட் போர்டு' அட்டையிலான ஐந்து போஸ்ட் கார்டுகளைத் தருவார். ஸ்டூடன்ட்ஸ் அதை வாங்கி பக்கத்து வகுப்பிலிருக்கும் தனது தோழிக்கோ தோழனுக்கோ கடிதம் எழுதி தபால் பெட்டியில் போட்டுவிடுவார்கள். அந்தத் தபால்களை எடுத்து உரிய மாணவரிடம் சேர்ப்பது 'போஸ்ட்மேனின்' வேலை.

மாணவர்களுக்குத் தொழிற்கல்வியைக் கத்துக் கொடுக்கிறதுக்காக வருஷத்துக்கு 5,500 ரூபாய் கொடுக்குது அரசாங்கம். அதுல சாம்பிராணி, ஊதுபத்தி செய்யுறதை சொல்லிக் குடுத்தாப் போதும்னு சொல்றாங்க. நாங்க கூடுதலாப் பணத்தைப் போட்டு ரெண்டு தையல் மெஷினை வாங்கிப் போட்டோம். தையல் பயிற்சி குடுக்குறதுக்காக ஒரு டீச்சரையும் நியமித்தோம். இப்ப எங்க பசங்கள்ல பலர் தங்களுடைய டிரெஸ்களை மட்டுமில்லாம அடுத்தவங்களுக்கும் டிரெஸ் தச்சுக் குடுக்கிற அளவு தேர்ந்துட்டாங்க. கிராமத்தினரும் சக ஆசிரியர்களும் ஒத்துழைப்பு கொடுக்காட்டி என்னால இதையெல்லாம் சாதிச்சுருக்க முடியாது'' என்றார் அடக்கத்துடன்.

நகர்ப்புற பள்ளிகளில் படிக்கும் மாணவர்கள் பலரே கம்ப்யூட்டர் பற்றிய நேரடி அறிமுகம் இல்லாமலிருக்க, இங்கே ஐந்தாம் வகுப்பு மாணவர்கள்கூட கம்ப்யூட்டரை இயக்கி 'பிரின்ட்-அவுட்' எடுக்குமளவுக்குப் பயிற்சி பெற்றிருக்கிறார்கள். மாணவர்களிடம் வாசிப்புத் திறனை வளர்ப்பதற்காக ஒரு ஆங்கில தினசரி உள்பட நான்கு தினசரிகளை வாங்கிப் போடுகிறார்கள். இதில் ஒன்றை மாணவர்கள் செலவிலேயே வாங்கிப் போடுகிறார்கள். இவற்றில் வெளிவரும் செய்திகளை பிரேயரில் மாணவர்களே வாசித்தும் காட்டுகிறார்கள். யாராவது ஒரு ஆசிரியர் லீவிலிருந்தால் அவர் நடத்த வேண்டிய பாடம் வகுப்பறையில் சி.டி. பிளேயர் மூலம் ஒளிபரப்பாகிவிடும்!

தலைமை ஆசிரியர் ஜோதிமணியைப் பற்றி சக ஆசிரியரான மேகநாதன் நம்மிடம், ''இந்தப் பள்ளியில் ஜோதிமணி சாருக்குக் கீழே நாங்களும் பணிபுரிவதைப் பெருமையா நினைக்கிறோம்'' என் கிறார் நெகிழ்வுடன்.

இப்பள்ளியின் முன்னாள் மாணவரான சக்திவேல், ''நாங்க படிக்கிறப்பெல்லாம் பதினோரு மணிக்குத்தான் வாத்தியாரே வருவார். இன்டர்வெலுக்கு வெளியில போனா திரும்ப வரவே மாட்டோம். 'ஏன்வரலை?'னு கேக்குறதுக்குக்கூட ஆள் இருக்காது. ப்ரௌஸிங் சென்டர் வச்சுருக்கிற எனக்கே கம்ப்யூட்டரை முழுமையாக உபயோகிக்கத் தெரியாது. ஆனா, இந்தப் பசங்க சர்வ சாதாரணமா கம்ப்யூட்டர்ல புகுந்து விளையாடுறதைப் பார்த்தா, நாங்க படிச்சப்பவே இந்த மாற்றங்கள் வரலியேனு ஏக்கமா இருக்குங்க'' என்கிறார்.

மாங்குடி ஊராட்சிமன்றத் தலைவரான பாலாமணி ரெங்கசாமி, ''எங்க ஊரு பிள்ளைகள்லாம் பணம் வாங்காத கான்வென்ட்ல படிச்சுக்கிட்டிருக்காங்க! இந்தப் பள்ளியோட வளர்ச்சிக்காக எதைக் கேட்டாலும் செஞ்சு குடுத்துட்டுத்தான் மறு வேலை. கூடிய சீக்கிரமே இங்கே இருக்கிற லைப்ரரி ஹாலுக்கு ஏ.ஸி. வசதி பண்ணிக் குடுக்கப்போறோம்'' என்றார் பெருமிதத்துடன்.

அர்ப்பணிப்பு உணர்வு என்ற வார்த்தையை அடிக்கடி கேள்விப்படுகிறோம். அரசுப் பணிகளில் அது அபூர்வமாகிவிட்ட இந்த நாளில், வாழும் உதாரணமாக விளங்கும் ஜோதிமணி போன்ற விதிவிலக்குகளுக்கு அரசாங்கம் நிறையவே ஊக்கமும் அங்கீகாரமும் தரவேண்டும். அதுதான் அர்ப்பணிப்புக்குத் தருகிற அற்புதமான மரியாதையாக இருக்கும்!

நன்றி :- ஜூனியர் விகடன். Feb 24-28, 2008

பிலிபைன்சில் - குண்டு பல்ப்புக்கு குண்டு

2008-02-06T17:56:00.000-07:00

ஆஸ்திரேலியா, கனடாவை தொடர்ந்து தற்பொழுது பிலிபைன்சும் 2010-ம் ஆண்டுக்குள் அனைத்து குண்டு பல்புகளையும் (incandescent bulb) பயன்படுத்துவதை கைவிடுகின்றது.

இதற்கு மாற்றாக குறைந்த அளவு மின்சாரத்தில் இயங்கக்கூடிய சுருள் பல்புகளை பயன்பாட்டில் கொண்டுவர இருப்பதாக பிலிபைன்சின் அதிபர் கோலோரி (Gloria Macapagal Arroyo) தெறிவித்தார். இவ்வாறான நடவடிக்கையை ஆசியாவில் முதல் நாடக பிலிபைன்ஸ் நடைமுறை படுத்தவிருக்கின்றது.

இந்த மாற்று நடவடிக்கை மூலம் மின்சாரதேவையை பெரும்மளவு குறைக்க இயலும் எனவும், மின்சார உற்பத்தியை குறைப்பதன் மூலம் கரிஅமில வாயுக்கள் (Greenhouse gas) வெளியிடுவதை குறைக்க இயலும் எனவும் ஆசிய வளர்ச்சி வங்கியின் தொழில் நுட்ப ஆலோசகர் தெரிவித்தார்.

சுருள் பல்புகள், குண்டு பல்புகளை காட்டிலும் பன் மடங்கு விலை அதிகம். இதனை சாமானியவர்களுக்கு சாமானியம் ஆக்கும் வகையில் $30 மில்லின் அளவிளான பொருளாதார உதவி திட்டதையும் கொண்டு வர இருப்பதாக மனிலாவை சேர்ந்த வங்கி மேலாளர் தெறிவித்தார்.

அதேல்லாம் சரி இந்த சுருள் பல்ப்ப உபயேகிப்பதால் அப்படி என்ன லாபம்னு கேக்கறிங்கள?

100 வாட் எரிதிறன் கொண்ட குண்டுபல்பின் வெளிசத்தை 25 வார் எரிதிறன் கொண்ட சுருள் பல்பின் மூலம் வெளிபடுத்த இயலும். சுருள் பல்பின் ஆயுட்காலம் குண்டு பல்பின் ஆயுட்காலத்தை விட 6 முதல் 10 மடங்கு அதிகம். இதன் மூலம் பொருமளவிளான எரிபொருளையும் எழை மக்களுக்கு மின்சார மானியம்மாக வழங்கும் பணத்தையும் அரசங்கத்தால் மிச்சப்படுத்த முடியும்.

அதேல்லாம் சரி இவ்வளவு எழுதிறியே நீ என்ன பல்பு உபயோகபடுத்துறனு? கேட்கிற்ங்கதானே....

கடந்த இரண்டு ஆண்டுகளுக்கு மேலாக என்னுடைய வீட்டில் வெறும் சுருள் பல்புகள் மட்டுமே. என் வீட்டில் 16 சுருள் பல்புகள் உபயோகத்தில் உள்ளன. இதன் மூலம் சாரசரி 42 கிலோ வாட் மின்சாரம் குறைவாக உபயோகிக்கின்றேன்.

16 பல்புகள் * 60 வாட் * 2 மணி நேரம் * 30 நாட்கள் = 57600 வாட்/ஒருமாதம்

16 பல்புகள் * 15 வாட் * 2 மணி நேரம் * 30 நாட்கள் = 14400 வாட்/ஒருமாதம்

1 கிலோ வாட் மின்சாரம் 1 ரூபாய் என்றாலும் மாதம் கிட்டதட்ட 42 ரூபாய் எனக்கு சேமிப்பு.

நீங்க எப்போ எரிபொருளையும் உங்களது பணத்தையும் சேமிக்க போறிங்க ?

மேலும் விரிவான செய்திக்கு இங்க போங்க, சுருள் பல்ப பத்தி தெறிந்து கொள்ள இங்க போங்க

ஒரு கோடி தொழில்முணைவர்கள்

2008-01-30T16:47:00.000-07:00

இன்று முன்பகல் (Jan 30, 2008 11:00AM to 12:00 PM) WNPR பண்பலைவரிசையில் (FM Radio) "On Point" எனும் நிகழ்சி கேட்க வாய்ப்புகிடைத்தது. இதில் தருண் கண்ணன் எழுதிய "Billions of Entrepreneurs: How China and India Are Reshaping " புத்தகத்தின் மீதான கலந்துரையாடல் மற்றும் ஆசிரியருடனான நேர்காணல் நடைபெற்றது.

இந்த கலந்துரையாடல் இந்தியவை பற்றி நாம் ஆனைவரும் அறிந்த விசயங்களை சற்றே மாறுபட்ட கோணத்தில் சொல்லியிருக்கின்றார் புத்தகத்தின் ஆசிரியர், உதரணங்களுக்கு சில

இந்தியா சீனாவின் உற்பத்திதுறை இயந்தியர்களின் புதிய, புதிய வடிமைப்புகளையே உற்பத்திசெய்கின்றன.
இந்தியாவின் வலிமை அதனது மதிநுட்பமே, சீனாவின் வலிமை அதனது உற்பத்திறனும் தொழிலாள்களுமே.
இந்தியா சீனாவிடம் இருந்து கற்றுகொள்வதை காட்டிலும் சீனா இந்தியாவிடம் இருந்து அதிகம் கற்க வேண்டியுள்ளது (!!!!)
இந்தியாவின் அரசாங்கம் சீனாவின் அரசாங்கத்தை காட்டிலும் தொழிழ் மற்றும் மக்கள் நலன் விரும்பும் அரசு.

மேலும் Mahaindara & Mahaindar- வின் தாயாரிப்புகளான சிறிய வகை விவசாய கருவிகள் அமெரிக்க சந்தையில் அதிகம் புளங்குவது மற்றும், இந்தியாவின் முன்னேற்றதின் பல காரணிகள் அலசப்பட்டது.

மேலும் தகவலுக்கு இங்கே சொடுக்குங்கள். இது MP3 வடிவில் தரவிரக்கம் செய்யும் கொண்டுள்ளது.

டாடாவின்- நானோ

2008-01-10T15:46:00.000-07:00

டாடா நிறுவனத்தின் குறைந்தவிலை மகிழ்வுந்தான "நானோ" நேற்று (Jan 10, 2008 ) டெல்லியில் நடந்த மோட்டார் வாகனத்திற்கான கண்காட்சியில் அறிமுகம் செய்து வைக்கப்பட்டது. இது பலரது எதிர்பார்புகளை கொண்டிருக்க முக்கியகாரணம் அதன் விலையாது 1,00,000 ரூ என்பதே. இந்த வாகனம் இந்திய நடுத்தர வர்கத்துக்கான வரப்பிரசாதம் என்றே சொல்லாம்.

இதன் வாகனத்தின் வரவால் இந்தியாவில் நடக்கும் ஒரு சில மாற்றங்களை காண்போம்.

1. இனி இரண்டு சக்கர வாகனத்தில் மொத்த (4 நபர்) குடும்பத்தையும் ஏற்றிக் கொண்டு போகும் பயணத்தை தவிர்கலாம். இது இரட்டை சக்கர வண்டியில் அதிகநபர்களை ஏற்றி செல்வதைக் காட்டிலும் பாதுகாப்பானதே.

2. நான்கு சக்கர வாகனத்தினர் பொரும்பான்மையானவர்கள் வாகன காப்பீடுவைத்திருப்பது வாடிக்கை. டாடாவின் நானோ இந்திய வாகன காப்பீட்டு துறையை அடுத்த கட்டத்திற்கு எடுத்து செல்ல உதவும்.

3. இவ்வாகனத்தின் மூலம் இந்திய சாலைகளில் லேன் (Lane System) முறையை செயல் படுத்த பெரிய அளவிலான வாப்புக்கள் உள்ளன.

மேலே சொன்ன அனைத்துமே டாடாவின் நானோ இரண்டுசக்கர வாகனத்திற்கான ஒரு மாற்று வாகனமாக அமையும் என்ற கணிப்பிலே.

இப்பதிவை எழுததூண்டிய காரணிகள் இவைகள் அல்ல. டாடாவின் நானோ மேற்கத்திய நாட்டு மோட்டார் வாகன தயாரிப்பாளர்களின் வயிற்றில் கரைத்த புளியே!

அப்படி என்னதான் இந்த நானோவால் செய்ய இயலும்

1. இந்திய சாலைகளை டாடாவின் நானோ நிறப்பும். இதனால் இந்தியாவின் எரிபொருள் தேவையை அதிகரிக்கும். அதன் பொருட்டு ஏற்படும் எரிபொருளின் தட்டுப்பாடும், விலையேற்றமும் மேற்கத்திய நாடுகளை நேரடியாக பாதிக்கும். இதனால் மேற்கத்திய நாடுகளின் மோட்டார் வாகன விற்ப்பனை மேலும் சரிவடையலாம். மேற்கத்திய தயாரிப்பு மோட்டார் வாகனங்களை முழுதாக தவிர்த்து ஜப்பானிய தயாரிப்புகளை மேலும் அதிகமாக வாங்கலாம் ஏன் நம்து டாடாவின் தயாரிப்புகளை கூட வாங்கலாம்.

2. வளரும் நாடுகளின் மோட்டார் சந்தையின் பெரும் பகுதியை இவ்வாகனம் கைபற்றும்.

3. நானோவின் எரிபொருள் சிக்கன பயன்பாட்டு திறன், அதாவது 1லிட்டர் பெட்ரோலில் 20 முதல் 26 KM செல்லும் திறன். இதை அமெரிக்க அளவுகளில் சொன்னால் 1 கேலனுக்கு (3.73 லிட்டரில்) 50 (80 KM) மைல் கடக்க இயலும். நானோவின் இந்த எரிபொருள் பயன்பாட்டு திறனும் அதன் விலையாகிய $2,600-ம் மேற்கத்திய மோட்டார் வாகன உற்பதியாளருக்கு ஒரு அழுத்தை ஏற்படுத்தியுள்ளது என்றால் மிகையாகது.

நானோவில் மற்ற மோட்டார்வாகனத்தை காட்டிலும் பாதுகாப்பு அம்சங்கள் மிகக்குறைவாக இருப்பினும் இரண்டு சக்கர வாகனத்தை காட்டிலும் பாதுகாப்பானது. இவ்வாகனம் மோட்டார் சந்தையில் ஒரு வலம் வரும் என்பதை மறுக்கமுடியாது.

இந்திய மோட்டார் தயாரிப்புகளை உலகம் உற்று நோக்க வைத்தமைக்கு ஒரு சபாஷ் டாடா!!

ஆர்டிகள் 226, அன்னிய மண்ணில் இந்தியானின் காவலன்

2007-09-09T18:54:00.000-06:00

சமிபகாலமாக இந்தியாவிலிருந்து வெளிநாட்டிற்கு வேலைக்கு சென்ற இந்தியர்கள் மர்மான முறையில் இறப்பதும் அல்லது கொலை செய்யப்படுவதும், அதன் பின் பொதிய உலகஞானம் இல்லாத அவர்களது பெற்றேர் இறந்தோரின் சடலத்தை கூட காண முடியாமல் பரிதவிப்பதும் நாம் ஊடகங்களில்காண கூடிய செய்தி. இதில் மர்மான முறையில் இறந்த (அ) கொல்லப்பட்டதற்காண பின்புலத்தை அறிவதும், குற்றவாளியை கண்டுபிடித்து தண்டனை வாங்கிதருவது என்பது கணவிற்கு அப்பாற்பட்ட விசயமாகிவிட்டது.

கடந்த ஜனவரி மாதம் 28ம் தேதி சிவகங்கை மாவட்டம் குமாரகுறிச்சி கிராமத்தை சேர்ந்த விவசாய கூலியான திரு.சேதுராமன் மகன் சுசீந்திரன் மலோசியாவின் தலைநகரம் கோலாலம்பூரில் மர்மமான முறையில் கொல்லப்பட்டார்.

இது சம்பந்தமாக உள்ளுர் காவல் நிலையதில் தனது மகனது கொலையை பற்றி வழ்க்கு பதிவு செய்ய முயன்று இயலாத நிலையில் திரு.சேதுராமன் உயர் நீதிமன்ற தலமை நீதிபதிக்கு மனு ஒன்றை தாக்கல் செய்தார், அது இலவச சட்ட உதவி மையத்துக்கு வந்து, மதுரை உயர் நீதிமன்றத்தில் வழக்காக பதிவு செய்யப்பட்டது.

சேதுராஜவின் நிலையை நன்கு உணர்ந்த தலமை நீதிபதி ராமசுப்பிரமணியன் அவர்கள் மனுவை விசாரணைக்கு எடுத்து, கோலாலம்பூர் அரசு மருத்துவமனையில் பாதுகாக்கப்படும் சுசீந்திரனின் உடலை மூன்று வாரங்களுக்குள் இந்தியாவுக்கு கொண்டு வருவதற்கு மலேசியாவில் உள்ள இந்திய துதரகம் நடவடிக்கை எடுக்க வேண்டும், கொலைக்கு காரணமானவர்களின் மீது பரமகுடி காவல்நிலையத்தில் வழக்கு பதிவு செய்து நடவடிக்கை எடுக்கவேண்டும், இந்திய அரசு பதிக்கப்பட்ட திரு.சேதுராமனுக்கு நிவாரணம் வழங்க நடவடிக்கை எடுக்க வேண்டும் என உத்தரவிட்டுள்ளார்.

இந்திய அரசியல் அமைப்பு சட்டத்தின் ஆர்டிக்கிள் 226-ன்படி 'இந்திய மக்களுக்கு எதிராக எங்கெல்லாம் அநீதி நடக்கிற்தோ. அங்கே அவர்களின் நலனைப் பாதுகாக்க வழி செய்யப்பட்டுள்ளது'. இப்படி முன்மாதிரியான உத்தரவை பிறப்பித்திருப்பதின் மூலம் அதனை உறுதி செய்திருக்கின்றது மதுரை நீதிமன்றம்.

நன்றி:- விகடன்.

மெல்லத் தமிழ் இனி வளரும்

2007-08-25T19:18:00.000-06:00

தமிழ் நாட்டில்லுள்ள மாநில அரசு மற்றும் உள்ளாட்சித் துறையின் மேற்பார்வையில் நடைபொரும் அனைத்து பள்ளிக்கூடகங்களிலும், மெட்ரிகுலேசஷன் மற்றும் ஆங்கிலோ-இந்தியன் பள்ளிகளிலும் தமிழ் ஒரு பாடமாக கட்டாயம் கற்றுத் தரப்பட வேண்டும் என்று தமிழக அரசு கொண்டு வந்த சட்டத்தை, இப்போது உயர் நீதிமன்றமும் செல்லும் என்று அங்கீகரித்திருப்பது தமிழ் உணர்வும் தமிழ்மொழி மீது பற்றும் கொண்ட அனைவரும் வரவேற்கவேண்டிய தீர்ப்பு.

தற்போதைய தி.மு.க அரசு செய்திருக்கும் ஒருசில வரவேற்கதக்க நடவடிக்கைகளில் ஓன்றுதான் தமிழ் கட்டாயப் பாடமாக வேண்டும் என்கிற இந்த சட்டம். உயர் நீதிமன்றமும் இந்தச் சட்டத்திற்கு அங்கீகாரம் அளித்திருப்பதன் மூலம், தமிழகம் மீண்டும் மூன்று மொழிக் கொள்கையைப் பின்பற்றுவதில் இருந்த தடையை நீக்கியிருக்கிறது.

தமிழ் தெரியாமல் தமிழகத்தில் கல்வி கற்க முடியும் என்கிற நிலமை இனி தொடராது! மெல்லத் தமிழ் இனி வளரும்.

நன்றி திணமணி

பறக்கும் நேரம்மிது - இந்தியா

2007-03-02T21:42:00.000-07:00

இது உங்களில் பலர் அறிந்த விசயமாக இருக்கலாம். இருந்தாலும், மற்றும் ஒரு முறை.

மாட்டுச் சாணத்திலிருந்து மின்சாரம்!

2007-01-18T17:35:00.000-07:00

மாட்டுச் சாணத்திலிருந்து மின்சாரம்!

அமெரிக்க வெர்மாண்ட் மாநிலத்தின் பொது மின் உற்பத்தி
நிறுமத்திலிருந்து -CVPS(Central Vermont Public Service)
அறியப்பெறும் ஒரு பாடம்!

வேண்டாமென்று மாடுகள் கழிக்கும் சாணத்திலிருந்து
"சாண எரி வாயு" (Cobar gas) தமிழகத்தில் ஊரெங்கும் தயாரித்ததை
எண்பதுகளில் பார்த்திருக்கிறேன். அது பெரிய இயக்கமாகவே
அரசாங்கத்தால் நடத்தப்பட்டதென்று நினைக்கிறேன், மேலதிக
தகவல்கள் என்னிடம் இல்லை. ஒன்றுக்கு மேற்பட்ட மாடுகள்
வைத்திருந்தவர்களின் வீடுகளில் கூட அரசு உதவியுடன்
"சாண எரி வாயு" கலன்கள் பதித்து, அடுப்புகளை விறகுகளிலிருந்தும், மண்ணெண்ணையிலிருந்தும் விடுவிக்குமுகமாகவும்,
மாட்டுச் சாணக் கழிவினை பயன்படுத்துமுகமாகவும்
அந்த முயற்சி இருந்தது. பயன்பாட்டுக் காரணமாகவோ,
சூழ்நிலைப் பாதுகாப்புக் காரணமாகவோ அந்த முயற்சி
தோல்வியைத் தழுவியது.

வெர்மாண்ட் மாநிலம் முழுமைக்கும், மாட்டுப் பண்ணைகளுக்கு
பெயர் போனது. வெர்மாண்டின் இலையுதிர்காலத்து மர இலைகளின்
நிறமாற்றமும், குளிர்காலத்தின் பனிமலைகளில் நடைபெறும்
பனிச்சறுக்கும் கொணரும் பயணிகள் தான் பெரு வருமானமாக
இருந்தாலும், பண்ணைகளுக்கு முக்கிய வருமானத்தில்
பெரும்பங்கு உள்ளது.

இணையத்தில் படித்த தகவலில், வெர்மாண்ட்டில் மாட்டுச்
சாணத்திலிருந்து வெற்றிகரமாக மின்சாரம் தயாரித்து மக்களுக்கு
அளிப்பது சாத்தியமென்பது, நாளை நமது ஊரிலும் நடக்க வாய்ப்பு
இருப்பதெனக் காட்டுகிறது. பண்ணைகளில் வீணாக்கப்படும்
மாட்டுச் சாணம், அதிக மீத்தேன் வாயுவை விடுவிக்கும்,
இந்த மீத்தேன் வாயு, கரியமில வாயுவைவிட சூழலுக்கு
பெருங்கேடு தரும்.இவர்கள் மாட்டுச்சாணத்தை, பெரிய மூடிய
காற்றுப்புகா உலையிலிட்டுப் பின், சாணத்திலிருந்து வரும்
மீத்தேன் வாயுவை எரித்து அதிலிருந்து மின்சாரம் தயாரிக்கின்றனர்.
எரிப்பதனால் வரும் கரியமில வாயு மீத்தேனை விட சூழலுக்கு
குறைவான தீங்கு செய்வதால், இது ஏற்புடையதாக இருக்கிறதென
தெரிவிக்கின்றனர்.

பண்ணைகளில் மின்சாரம் தயாரிக்கும் உலை நிறுவுவதற்கு
பெருஞ்செலவு ஆகுமென்றாலும், CVPS-ன் பங்களிப்பாலும்,
மின்சாரத்தை விற்பதால் வரும் வருமானத்தாலும் அதை
சரிக்கட்ட முடியுமென்று தெரிவிக்கின்றனர். இதுவரை
2500 CVPS பயனர்கள் இந்த மின்சாரத்தை பயன்படுத்துகின்றனர்.

சில சுற்றுப்புற சூழல் ஆர்வலர்கள் இந்தியாவில் மாட்டுச்
சாணத்திலிருந்து வெளிப்படும் மீத்தேன் வாயுவால்
சுற்றுப்புற சூழலுக்கு பெருங்கேடென குற்றம்சாட்டி வருவது
நினைவுக்கு வருகிறது. இதுபோல் மாட்டுச் சாணத்திலிருந்து
மின்சாரம் தயாரித்து, மீத்தேன் உமிழ்வை குறைக்கும்
முயற்சி அவர்களுக்கு ஏற்புடையதாக இருக்குமென
எண்ணுகிறேன்.

நடைமுறைப்படுத்துவதில் சிக்கலாக இருக்கக் கூடியவை
1) மின் உலை நிறுவதில் ஆகும் பெருஞ்செலவு
2) நிறுவுவதற்கான தொழில்நுட்பம் அறிதலும்
3) வெர்மாண்ட் பண்ணைகளில், சில நூறு மாடுகளாவது இருக்கும்,
எண்ணிப்பார்க்கையில் கூட்டுறவாய் செய்தால்தான் நம் ஊருக்கு
இது ஒத்துவருமோ என்ற கேள்வி எழுகிறது.

பின் குறிப்பு:-
இந்த பதிவை எழுதி முடித்துப் பதிவதற்குமுன்,
மேலதிக தகவலுக்காக இது குறித்து கூகுள் செய்ததில்,
தஞ்சாவூர் சக்கரபள்ளி ஊராட்சியில், மகளிர் சுய உதவிக் குழுவினர்
அரசு உதவியுடன் 7.9 கோடி செலவில் மிகப்பெரிய முயற்சியை
முன்னெடுத்து சென்று கொண்டிருப்பது குறித்து தெரிந்துகொள்ள
முடிகிறது. மாட்டுச்சாணம் மட்டுமல்லாமல், மனிதக் கழிவுகளையும்
இங்கே பயன்படுத்தி வருகின்றனர். தஞ்சாவூர் முமுமைக்கான,
பெரிய அளவிலான முயற்சியின் ஒரு பகுதியாக இது நடப்பது
அறிய வந்ததில் எனக்குப் பெரு மகிழ்ச்சி!
ஊர் கூடி தேர் இழுக்கிறார்கள்!
இதற்கான தொடுப்பு:-
http://www.hindu.com/2005/04/07/stories/2005040704950300.htm

இந்தியாவை நோக்கி

2007-01-13T21:17:00.000-07:00

மருத்துவ சுற்றுலா(Medical Turisom) பற்றி பெரும்பான்மையானவர்கள் முன்பே அறிந்திருப்பீர்கள். ஓரிரு ஆண்டுகளுக்கு முன் ஐரோப்பிய நாடுகளில் இருந்து இந்தியாவிற்கு மருத்துவ சுற்றுலா வந்தவர்கள் பற்றிய செய்தியை படித்தேன். ஆனால் அமேரிக்க மக்கள் வந்த செய்தியை சென்ற வாரம்தான் முதல் முறையாக(நான்) பார்த்தேன்.

டெல்லி Planet Hospital பற்றியும் இங்கு அமேரிக்கர்களின் தொடர் வருகையை பற்றியும் ABC News-ல் பார்க நேர்தது. இதை பார்கையில் ஒரு பெருமிதம் கலந்த மகிழ்ச்சி எனக்கு. இந்திய மருத்துவனின் சர்வதேச தரம் உயர்து கொண்டேயுள்ளது என்பது அது.

அமேரிக்க மருத்துவமனைகளில் கிடைக்கும் அதே (அதற்கு மேலும்) தரமான மருத்துவ வசதி இந்தியாவில், அமேரிக்காவில் ஆகும் செலவில் முன்றில் ஒரு பகுதி செலவிலே கி்டைக்கிறது. மேலும் சிகிச்சை முடிந்து நாடு திரும்பிய நோயாளிகள் எந்த நேரத்திலும் இந்திய மருத்துவருடன் vedio conference முலம் கலந்து ஆலோசிக்க முடியும்.

இது இந்திய முன்னேற்றதிற்கு மேலும் ஒர் பங்களிப்பு.

மேலும் விவரங்களுக்கு இங்கே சொடுக்குங்கள்.

குறிப்பு:- மேலே சென்ன செய்தி இரண்டாவது நிமிடத்தில் இருந்து துவங்குகிறது.

தமிழுக்கு இனி மரணம் இல்லை!

2006-12-20T19:11:00.000-07:00

ஒரு மாதத்துக்கு முன்பு எனது மலையாள நண்பன், மணிரத்தினத்தின் கண்ணத்தில் முத்தமிட்டால் திரைப்படத்தை பற்றி என்னிடம் சில்லாகித்து பேசிக் கொண்டு இருந்தார்.

அந்த படத்தின் கதையும் அதை மக்களுக்கு திரைப்படமாக தந்தவிதமும் தன்னை கவர்ந்ததாக சொன்னார். அந்த படத்தை பற்றி மேலும் பேசிக்கொண்டு இருக்கையில் "அந்த படத்தின் DVD எங்கிருந்து கிடைத்தது?" என்று கேட்டேன். அதற்கு அவர்தந்த பதில் என்னை ஒரு சிறிய ஆச்சர்யத்தில் ஆழ்த்தியது.

அவர் சொன்ன பதில் "உப்பு ஏரி நகரத்தின் பொது நூலகம் (Salt Lake county Library) ". அந்த பதில் ஒரு வியப்பை தந்தாலும் "நம் தமிழ் மக்கள் யாராவது அதை நூலகத்திற்கு நன்கொடையாக தந்திருப்பர்" என்று எனக்கு நானே ஒரு சமாதானத்தை சொல்லிக் கொண்டேன்.

ஆனால் இன்று thatstamil.com இணையதளத்தில் வந்த செய்தி என் கணிப்பை பொய்யாக்கி, ஒர் உண்மையை சொல்லியது, அது கண்ணத்தில் முத்தமிட்டால் திரைப்படம் உப்பு ஏரி நகரத்தின் பொது நூலகம் மட்டும் அல்லாது அமெரிக்க பொது நூலகம் அனைத்திலும் கிடைக்கிறது என்பது.

மற்றும் அத்திரைப்படம் நவம்பர் 18-ம் தேதி இவாண்ஸ்ட்ன் (Evanston, IL) நகர பொதுநூலகத்தில் திரையிடப்பட்டது. நமது இந்தியர்கள் அன்றி பாகிஸ்தான், சீனா, அமெரிக்கா, பிரேசில் மற்றும் பிற நாட்டவரும் ஆங்கில துணை எழுத்துக்களுடன் (English subtitle) கண்டுகளித்தனர்.

இனி கண்ணத்தில் முத்தமிட்டால் திரைப்படம் கட்டணமின்றி வாடகைக்கு அமெரிக்க பொது நூலகங்கள் வாயிலாக கிடைக்கும் (thatstamil.com-ல் ஒரு டாலர் வாடகையில் கிடைப்பதாக குறிப்பிட பட்டிருந்தது அது தவறு). மேலும் விவரங்களுக்கு இங்கே சொடுக்குங்கள்.

கடந்த வெள்ளியன்று உப்பு ஏரி நகரத்தின் பொது நூலகம் சென்ற என் நண்பன் பார்த்து வந்த இன்னொரு விசயம். சமையல் பிரிவில் மூன்று பிரதாண புத்தகங்கள் வாசிப்பாளர் அனைவருக்கும் தெரியும்படி வைக்கப் பட்டிருந்தது, அந்த முன்று புத்தகமும் வெவ்வேறு மொழியில் எழுதப்பட்டவை அவை

ஆங்கிலம்
சீனா மற்றும்
தமிழ்

இவைகளை எல்லாம் பார்க்கும் பொழுது எனக்கு வைரமுத்துவின் கவிதையில் இருந்து ஒரு வைர வரி ஞாபகத்திற்கு வருகிறது.

"தமிழுக்கு இனி மரணம் இல்லை!"

குறிப்பு:- உப்பு ஏரி நகரத்தின் பொது நூலகத்தின் தமிழ் புத்தகங்களின் புகைப்படத்தை விரைவில் இங்கு இணைக்கிறேன்.

வனம் வளர்கிறது.

2006-12-06T20:14:00.000-07:00

ஓஸோன் படலத்தில் ஓட்டை பெரிதாகிக் கொண்டுள்ளது.
பூலோக பந்து சூடாகிக் கொண்டுள்ளது
மழை வளம் குன்றிவருகிறது.
2025-ல் உலக நாடுகள் தண்ணீர்காக சண்டையிட்டு கொள்ளும்
வனங்கள் அழிந்து வருகிறது

என்று மட்டுமே செய்திகளில் கேட்டுக் கொண்டும், படித்துக்கொண்டும் இருந்த நமக்கு ஒரு வித்தியாசமான செய்தி

அது உலகத்தில் உள்ள காடுகளின் பரப்பளவு அதிகரிகின்றது என்ற செய்தி.

குறிப்பாக சீனா, இந்தியா மற்றும் துருக்கியில் உள்ள காடுகளின் அளவு குறிப்பிட தக்க அளவு அதிகரித்திருக்கின்றது.

இந்தியாவில் காடுகள் வளர்வதற்கு முக்கிய காரணங்கள்

மரம்நடுவதை ஒரு சில அமைப்புகள் விழாவாகவும், தொண்டாகவும் எடுத்து செய்வது.
மரங்களை வெட்டுவதற்கான நிபந்தனைகளை அதிகப்படுத்தியிருப்பது
மற்றும் மேம்படுத்தப்பட்ட விவசாயமுறைகள்

என ஒர் ஆய்வரிக்கை தெரிவிக்கின்றது.

மேலும் விவரங்களுக்கு இங்கே சொடுக்குங்கள்

நல்லார் ஒருவர்-1 www.charactercounts.org

2006-11-29T22:01:00.000-07:00

வள்ளுவன் வாக்கு:-
ஒழுக்கம் விழுப்பந் தரலான் ஒழுக்கம்
உயிரினும் ஓம்பப் படும்.

உண்மையோ பொய்யோ, ஒழுக்கத்திற்கும் அறநெறிக்கும் பெயர்
போன நாடு நம் தாயகம் என்று என்னால் அடிக்கடி சொல்லிக்
கொள்ளாமல் இருக்க முடியவில்லை. இங்கே ஒழுக்கம் என்பது
மாறிலி (constant) அல்ல, ஒப்புநோக்குதலின் அடிப்படையில் தான்!

சக மனிதர்களை மதிக்கத் தெரிவதும் அவர்களின் நல்லுணர்வை
புரிந்துகொள்ளுதலுமே இன்றைய உலகின் பேரொழுக்கங்களாகும்.
வாழ்வியல் ஒழுக்கநெறிக்கு (ETHICS) சம காலத்தில் வாழ்பவர்களில்
பலரை நாம் எடுத்துக்காட்டாய் காட்டலாம், நம் நாட்டில் மட்டுமல்ல,
பூமிப்பந்தின் ஒவ்வொரு மூலையிலுள்ள ஒவ்வொரு நாட்டிலிருந்தும்
கூட எடுத்துக் காட்டலாம். அதில் பள்ளி மாணவர்களுக்கு
ஒழுக்கநெறி கற்றுக் கொடுப்பதையே தன் முழு முதல் கடமையாக
வைத்திருக்கும் அமெரிக்காவில் வசிக்கும் லாஸ்ஏஞ்சலஸ் நகரைச்
சேர்ந்த "மைக்கேல் ஜோசப்சன்" (Micheal Josephson) என்பவர்
இன்றைய வழிகாட்டிகளின் வரிசையில் ஒரு முக்கிய இடத்தை
நிச்சயம் பிடிப்பார்.

கடந்த பத்தாண்டுகளுக்கும் மேலாக, தனது முழு நேர தொழிலாக
ஒழுக்கத்தை மாணவர்களுக்கும் இளைய சமுதாயத்திற்கும்
கற்றுக் கொடுக்கிறார் திருவாளர் ஜோசப்சன் அவர்கள்.
ஜோசப்சன் ஒழுக்கநெறி நிறுவனம் (Josephson Institute for Ethics)
என்ற இலாபம்-சாரா (non-profit) நிறுவனத்தை இவர் நடத்தி
வருகிறார். பிள்ளைகள் வளரும் பருவத்திலே அவர்களுக்கு
ஒழுக்கத்தை கற்றுக் கொடுத்து, நல்ல குடிமகன்களாய் மாற்ற
வழிகாட்டும் இந்த பெருஞ் செயல், உலகத்தை ஒரே நாளில்
மாற்றியமைக்காது என்றாலும், நாளைய சமுதாயத்தை ஒரு
நல்லதொரு சமுதாயமாக உருவாக்குவதற்கான ஒரு நல்ல
செயல் என்பதில் சிறிதும் சந்தேகம் இல்லை. இவரின் நிறுவனம்
இன மற்றும் மத சார்பு இல்லாத ஒரு நிலையில்தான் ஒழுக்கத்தை
கற்றுக் கொடுக்கின்றது.

அவரின் வலைத்தளம் :- http://www.charactercounts.org/

கீழ்வரும் ஆறு அடிப்படை கொள்கைகளைத்தான் அவர்
மாணவர்களுக்கு முக்கியமாகக் கற்றுக் கொடுக்கிறார்.
1) நம்பிக்கைக்கு உரியவராய் இருத்தல் (Trustworthiness)
2) பிறரிடத்தில் மரியாதை (Respect)
3) பொறுப்புணர்ச்சி (Responsibility)
4) கண்ணியமாய் இருத்தல் (Fairness)
5) பிறரிடத்தில் கனிவு (Caring)
6) நல்ல குடிமகனாய் இருத்தல் (Citizenship)
ஆறு கொள்கைகள்:- http://www.charactercounts.org/defsix.htm

இது தவிர Work Ethics (வேலையிட ஒழுக்கம்) குறித்தும் வகுப்புகளை
நடத்துகிறார். தினம் ஒரு முறை உள்ளூர் வானொலியில் பல்வேறு
தலைப்புகள் குறித்தும் பேசுகிறார்.
இந்த சுட்டியில் நுழைக :- http://www.charactercounts.org/knxtoc.htm

பணம் சம்பாதிக்க பல நூறு வழிகளிருந்தும், அதையெல்லாம்
விடுத்து, நாளைய சமூகத்திற்கு வழிகாட்டியாக, நமக்கெல்லாம்
ஒரு முன்னுதாரணமாய் இருக்கும் மைக்கேல் ஜோசப்சன்
அவர்களுக்கு சிரம் தாழ்ந்த வணக்கங்கள்!!

தொடர்புடைய வலைத் தளங்கள்:-
முக்கிய வலைப்பக்கம் :- http://www.charactercounts.org/
ஆறு கொள்கைகள் :- http://www.charactercounts.org/defsix.htm
வானொலி பேச்சு :- http://www.charactercounts.org/knxtoc.htm

அன்புடன்,
நம்பி.பா.

பிகு. இந்த பதிப்பு வைகறைவானத்தில் ஏற்கனவே பதிக்கப்பட்டுள்ளது.

செய்து முடித்தவன்

2006-11-17T20:06:00.000-07:00

ஒரு நாட்டு மக்களின் பொருளாதாரம் எப்படி உயரும் ?

எந்த ஒரு நாடு தனது அடிப்படை தேவைகளை உள் நாட்டு உற்பத்தியின் மூலம் பூர்தி செய்து அதே உற்பத்தியின் மூலம் அன்னிய செலாவனியை ஈட்டுகிறதோ அந்த நாடே பொருளாதார பலம் பெற்றதாக திகழும்.

சரி ஒரு கிராமத்தின் பொருளாதாரத்தை எப்படி உயர்த்த முடியும்?

ஒரு நாட்டுக்கு என்ன வழிமுறைகளோ அதேதான் ஒரு கிரமத்துக்கும். நாடும் கிராமமும் அளவுகளில் தான் வேறு, ஆனால் அடிப்படை பொருளாதார தத்துவங்கள் இரண்டுக்குமே ஒன்றுதான்.

இந்த பொருளாதார அடிப்படை தத்துவத்தை சென்னையில் இருந்து 30 கி.மீ தொலைவில், திருவள்ளுவர் போகும் வழியில் இருக்கும் குத்தம்பாக்கம் என்ற கிராமத்தில் நிகழ்த்தி காட்டியுள்ளார் அதன் தலைவர் இளங்கோ.

அண்ணா பல்கலைகழகத்தில் கெமிக்கல் இன்ஜினீயரிங் முடித்த பின் "ஆயில் இந்தியாவில்" தனக்கு கிடைத்த பணியை உதறிவிட்டு மக்கள் பணியற்ற வந்தவர் இவர்.

இனி ஆனந்த விகடனில் வெளிவந்த கட்டுரையில் இருந்து.

கெமிக்கல் இன்ஜினீயரிங் முடிச்சதும் ஆயில் இந்தியா கம்பெனி'யில வேலை கிடைச்சுது. ஓரிஸ்ஸாவில் இருந்தேன். என் கிராத்தை அப்படியே விட்டுட்டு நான் மட்டும் வேறெங்கேயோ போய் சந்தோஷமா வாழ மனசு ஒப்பலீங்க. வசதி வாய்ப்பு இருகிறவன்கூட இப்படி ஊரைவிட்டு வெளியேற்ட்டா. அப்புறம் மனுஷ்ங்களைக் காப்பாத்தறதுதான் யாருனு ஒரு குற்ற உணர்ச்சி.

ஏற்கெனவே நான் கிராமப் பஞ்சாயத்துச் சட்டத்தைக் கரைச்சுக் குடிச்சிருந்தேன். கிராமப் பஞ்சாயத்துங்கறது மத்திய-மாநில அரசுகளுக்கு உட்படாத 'சுய அரசங்கம்'னு சட்டம் தெளிவா சொல்லுது. ஊர் திரும்பி வந்தேன். எல்லார்கிட்டயும் பேசினேன். தேர்தல்ல நின்னேன். என்மேல நம்பிக்கை வெச்சு ஊர்மக்கள் என்னை ஜெயிக்க வெச்சாங்க. அதை நான் எனக்கான வெற்றியா நினைக்கலை. 'முடிஞ்சா இந்த ஊரை மாத்திக் காட்டுறா!னு மக்கள் விட்ட சவாலத்தான் எடுத்துகிட்டேன்.

இதோ இவரது பொருளதார தத்துவம்..

வயிறு பசிக்கிறப்போ. வசதிகளைப் பற்றி யோசிக்க முடியாது. முதலில் வேலை வாய்ப்புகளை உருவாக்கித் தர நானொரு சர்வே பண்ணினென். கிராமத்து மக்கள் கஷ்டப்பட்டு சம்பாதிக்கிற பணம். வேற யாருக்கோ போய்ச் சேருது. குத்தம்பாக்கத்தில் மட்டும் ஒரு மாசத்துக்கு அறுபது லட்சம் ரூபாய் மதிப்புள்ள பொருள்களை வெளியிலிருந்து வாங்கறோம். சோப்பு, சீப்புல ஆரம்பிச்சு வயலுக்கான உரம் வரை எல்லாமே வெளியில் இருந்துதான் வருது. இதில் பெரும்பாலான் பொருள்களின் மூலம் இங்குதான் உற்பத்தியாகுது.

உதாரணத்துக்கு அரிசி. மக்கள் பாடுபட்டு விவசாயம் பண்ணி. நெல்லை விளைவிக்கறாங்க. அதை மொத்த விலைக்கு வெளியூர்ல விக்கறாங்க. அது எங்கெங்கோ சுத்தி கடைசியில அரிசியா திரும்பி வருது. அதைப் பல மடங்கு விலை கொடுத்து வாங்கறங்க. ஆக அவங்களோட பொருளும் போச்சு.. பணமும் போச்சு! அப்புறம் எப்படி வறுமை ஒழியும்?

மக்களோட பணம். பணக்காரர்களிடம் தேங்காம மக்களிடமே சுழலணும். அதுக்கு நான் ஒரு வழி செஞ்சேன். கிராமத்துக்குத் தேவையான எந்த வேலைக்கும் காண்ட்ராக்டர்களின் உதவியை நாடுவதில்லை என்று முடிவு செய்தேன். கட்டடம் கட்டுவது. ரோடு போடுவது என் எல்லா வேலைகளையும் ஊர் மக்களே எடுத்துச் செய்தோம்.

அவருடைய தத்துவத்தின் மூலம் அவர் செய்து முடித்த காரியங்கள்.

ரூ88 லட்சத்தில் கட்ட திட்டமிடப்பட்ட வடிகால் கட்டும் பணி ரூ40 லட்சத்தில் கட்டிமுடித்தது
கள்ளசாரயம் காய்ச்சுபவர்களிடம் ரோடு போடும் பணி ஒப்படைக்கப்பட்டு அதன் மூலம் கிராமத்தில் கள்ளச்சாரயத்தை ஒழித்தது. (நல்ல வழியில் பணம் கிடைதால் யார் தான் தப்பு பணணுவாங்க?)
உள்ளூர் கட்டட கட்டுமானத்திற்கான செங்கல் அவர்களின் சொந்தமண்ணிலே தாயார் ஆவது.
15 பேர் கொண்ட சணல் பைகளுக்கான டெய்லரிங் யூனிட்டும், மற்றும் அதன் உற்பத்தி பொருட்கள் சுவிட்சர்லாந்துக்கு ஏற்றுமதி செய்யப்படுவது.
குறைந்த வாட்ஸ் தெருவிளக்குகள் தயாரிப்புக்கு ஒரு யூனிட்.
எண்ணெய் உற்பத்தி யூனிட், சோப்பு தயாரிக்கும் ஒரு யூனிட்.

இவை எல்லவற்றுக்கும் மேலாக இவரது வாழ்க்கை குறிக்கோளாகக் கூறுவது
"செய் அல்லது செத்துமடி" என்பார்கள் நான் செய்துவிட்டே சாக விரும்புகிறேன்.

இதை கேட்கையில் உள்ளுக்குள் ஏதோ வேகம் பிறக்குது.

மேலும் விவரங்களுக்கு இங்கே சொடுக்குங்கள்

நன்றி :-
ஆனந்த விகடன் 07-11-2004 மற்றும் 15-11-2006 தேதியிட்ட இதழ்கள்.

கனவும் காட்சியும்!!!

2006-11-17T17:29:00.000-07:00

வள்ளுவன் வாக்கு!
செயற்கரிய செய்வார் பெரியர் சிறியர்
செயற்கரிய செய்கலா தார்;
ஊழையும் உப்பக்கம் காண்பர், உலைவின்றித்
தாழாது உஞற்றுபவர்;

கனவும் காட்சியும்!!!

உணவு மட்டுமே இவர்களுக்கு உணவாய் இருக்கின்றது,
கனவுதான் உணவு என்பதே இவர்களுக்கு
தெரியவில்லையென்று! --(ஜேஜே சில குறிப்புகளிலிருந்து)
அதென்னவோ இன்றைக்கும் நிஜமாய்த்தான் இருக்கிறது.

கனவு காணுங்கள்! கனவு காணுங்கள்! கனவுகள் தான்
நிஜத்தின் பாதை, கனவுகள் தானே நாளை என்பதையே
நம் கண்களுக்கு காட்டுகின்றன.

"கண்ட கனவு பலித்தால்" என்பதுதானே
பல நேரங்களில் நாளையே நமக்கு துவக்கி வைக்கின்றது!
மாற்றியும் வைக்கின்றது.

விடியலில் உறக்கத்தை வழியனுப்பும் கனவு
நம் மனதை நிறைக்கா நாளேது?

உறக்கத்தின் கனவுகளில் சில
உலகத்திற்கே வழி காட்டியிருக்கின்றன.
உறக்கத்திற்கு மட்டுமல்ல,
விழிப்புக்கும் கூடத்தான் கனவு சொந்தம்.

விழிப்பின் கனவு சிறப்பான கனவு,
சிந்தையின் உச்சத்தின் வந்த கனவு அது!
செயலின் உச்சத்தில் வரும் கனவும் அதுவே!

விழிப்பின் கனவு வேறெதுவுமில்லை,
முனைப்பின் கனவு அது,
தியானத்தின் கனவு அது,
போதியினடியில் புத்தன் கண்ட கனவு அது.

நாளையின் பாதையை நமக்கு மட்டுமல்ல
உலகுக்கே மாற்றியமைக்கும் சக்தி கொண்டது அது .

கனவை காட்சியாக்கும் முயற்சியில்தான்
உலகே இயங்கிக் கொண்டிருக்கின்றது,
மறுக்க முடியாத உண்மை இதுதானே!!

நமது கனவென்ன?
எல்லோருக்கும் நல்லன எல்லாம் கிட்ட வேண்டும் என்பதுதானே!

நம் கனவும் காட்சியாகட்டும்,
நம் கனவையும் அயரா உழைப்பையும்
அதற்கே விலையாய் இன்றே தருவோம்!!

நம்புங்கள் நாட்கள் எல்லாம் பொய்,
இன்றின் கனவுகளும் நாளையின் காட்சியும் மட்டுமே உண்மை!

கனவு காணுவோம்! கனவு காணுவோம்!!

அன்புடன்,
நம்பி.பா.

பிகு. இந்த பதிவு http://vaigaraivaanam.blogspot.com பதிவிலும் பதியப்பட்டுள்ளது.

இந்தியா ஓர் விவசாய நாடு!

2006-11-11T21:02:00.000-07:00

இந்தியா ஓர் விவசாய நாடு! இந்தியர்களில் 80 விழுக்காடு விவசாயத்தையே பிரதாண தொழில்லாக கொண்டுள்ளனர் என்பது நாம் ஆனைவரும் அறிந்த ஒன்றே. ஆனால் இன்று விவசாயத்திற்கான முக்கியத்துவம் இந்தியாவில் குறைந்து கொண்டே வருகின்றது.

இயற்க்கை ஒரு பக்கம் விவசாயிகளை வஞ்சிக்கிறது என்றால்? 1970களுக்கு பின் விவசாய முன்னேற்றதில் கவனம் செலுத்தாத நம் அரசியல்வாதிகள் பண்ணாட்டு நிறுவனம் மற்றும் உலகமயமாக்கல் அலுத்தம் காரணமாகவும் இப்பொழுது விவசாயத்தை நேரடியாகவே வஞ்சிக்க ஆரமபித்து விட்டனர்.

ஊடகங்கள் விவசாயத்தை ஒரு தீண்டதகாத துறையாகவே கொண்டுள்ளனர். ஊடகங்களில் விவசாயத்தை பற்றிய செய்திகள் மற்றும் விளம்பரங்கள் 1 விழுக்காடு மட்டுமே.

இநத சூழ்நிலையில் மக்களால் பெரிதும் விரும்பப்படுகின்ற ஆனந்த விகடன் மற்றும் ஜீனியர் விகடன் விவசாயிகளின் பிரச்சனைகளை பேசுவதற்காகவே ஒவ்வொரு பகுதியை ஒதுக்கி உள்ளது. விவசாய துறைகளில் உள்ள பிரச்சணைகளை மக்களுக்கும் மற்றும் அதன் சம்பந்த பட்ட அதிகாரிகளுக்கும் உடனுக்குடன் தெரிவிக்கும் முக்கியப் பணியையும் செய்யத்துவங்கியுள்ளது.

இது மிகவும் வரவேற்க்கதக்க முயற்ச்சி!

லாரி + கோழி + முட்டை + 3 வருட உழைப்பு = ISO 14001

2006-11-07T21:47:00.001-07:00

நாமக்கல் நகரம் எதற்கு எல்லாம் பெயர் போனது ?

1.நாமக்கல் கவிஞர் இரமலிங்கம் பிள்ளை
2.நாமக்கல் மலைக் கோட்டை
3.லாரி
4. (கறி) கோழி
5. முட்டை
6. அனுமார் கோவில்

இவை அனைத்தும் பல ஆண்டுகளாக நாமக்கல் நகரத்திற்கு பெருமை சேர்த்த விசயங்கள். இடைப்பட்ட காலத்தில் இதே நகரம் மற்றும் ஒரு காரணத்திற்காக செய்திகளில் அடிபட்டது, அது அதிக அளவிலான எய்ட்ஸ் நோயாளிகளை கொண்ட நகரம் என்பதற்காக.

ஆனால் அந்த இடர்பாட்டை தாண்டி அதே நகரம் நம் தமிழர்கள்(இந்தியர்களையும்) அனைவரையும் பெருமை படுத்தும் விதத்தில் சத்தம் இல்லாமல் ஒரு சாதனையை செய்திருக்கிறது. அது இந்தியாவின் முதல் ISO 14001 தரசான்றிதல் பெற்ற நகரமாக இன்று திகழ்கிறது.

ISO 14001 தரசான்று என்பது தூய்மை, சுற்றுபுறசூழல் மற்றும் சிறந்த மேலாண்மை கொண்ட நகரத்திற்கு வழங்கப்படும் தரசான்றிதல்.

மேலும் விவரங்களுக்கு இங்கே சொடுக்குங்கள்